പൊന്നിൻ ചിങ്ങം

പൊന്നിൻ ചിങ്ങത്തേരിലേറി വന്നു പൊന്നോണം
പൊന്നണിഞ്ഞ മാമല നാടിന്റെയാഘോഷം
പൂമരങ്ങൾ താലമേന്തിയെങ്ങുമണഞ്ഞു
പൂവിളികൾ കൊണ്ടുനാടിന്നാകെയുണർന്നു

പൂത്തുമ്പിപ്പെണ്ണൊരുങ്ങി നൃത്തമാടുന്നേ
പൂവാകയിൽ കിളികൾ ഒത്തുപാടുന്നേ
പൂമേടയും കുടിയും ഒത്തുണരുന്നേ
പൂ ചൂടി മങ്കമാർ വന്നൊത്തുചേരുന്നേ

ആമോദത്താലെയർക്കൻ പുഞ്ചിരിക്കുന്നേ
കാർമേഘജാലമൊക്കെ മാറിനില്ക്കുന്നേ
ആനന്ദത്താലെ മന്നൻ വന്നണയുന്നേ
ഏവർക്കും സർവ്വമംഗളങ്ങൾ നേരുന്നേ