കാട്ടിലെ പൂവ് ++

എരിയുന്നവെയിലിനോടെതിരിടുന്നുപ്പാ
അതുനിന്നെയൂട്ടാനാണെന്നേയുറപ്പാ
പുഞ്ചിരി തൂകിപ്പറന്നൂനടപ്പാ
ഉരുകുമൊരുള്ളാർക്കും കാട്ടില്ലുറപ്പാ

കലങ്ങുമക്കണ്ണീന്നൊലിക്കുന്നതുപ്പാ
കഥനങ്ങളുള്ളിലൊളിപ്പിച്ചചെപ്പാ

നീയൊന്നടുത്താലാ ശബ്ദം കടുപ്പാ
ഉള്ളിന്റെയുള്ളിലോ നീയെന്നിടിപ്പാ

കേട്ടാലതൊക്കെക്കൊടുക്കാൻ തുടിച്ചാ
തീക്കട്ട കൈകളിലേന്തീ നടപ്പാ
തേയും ചെരുപ്പിന്റടിയിൽ നെരുപ്പാ- നിൻ
തേങ്ങലടക്കുവാനുള്ള കുതിപ്പാ

ഒരുവാരയകലെ നീയായാലിരുകണ്ണും,

ഇരുകൈയും മേലോട്ടുയർത്തും നിന്റുപ്പാ
ഇരവെല്ലാമിറയോനോടഴുതുവിളിപ്പാ
ഇഹവും പരവും നിന്നെ കാക്കാൻ കൊതിച്ചാ

നേട്ടം നിനക്കാകണം എന്നയാശ
കോട്ടം പൊറുത്തൂർജ്ജം നല്ക്കും പ്രത്യാശ
കാട്ടിൽ വിരിഞ്ഞോരുപൂവിന്റെ ചേലാ
കണ്ടെത്തും മുന്നേ കൊഴിയുന്നപോലാ

ഒരുജന്മം കൊണ്ടുതീരാത്തകുറിപ്പാ
ഒടുവിൽ ഒഴിവാക്കാനെടുക്കും കറിവേപ്പാ
വിട വാങ്ങിടുമ്പോൾ നീ പറയും ഉറപ്പാ
"ഈയുള്ളം ഞാൻ മാത്രം കണ്ടില്ലെന്റുപ്പാ"